Унаа жууган келиндин ымыркайын соороткон кардар. 22 жаштагы Махабаттын тагдыры

БИШКЕК, 20-июн. — Sputnik. Facebook социалдык тармагында унаа жууп иштеген жаш келиндин бир айлык ымыркайын кардарлар сооротуп жаткан видео чыкты.

"Унаа жуучу жай. Бишкек. Жашоо үчүн күрөш. Айдоочулар кезек-кезеги менен унаа жууп жаткан келиндин баласын карап турушат", — деп жазылган ал видеонун алдына.

Ролик интернет колдонуучулар арасында талкуу жаратып, келинге боору ачыгандар көбөйдү. Айрым колдонуучулар ага материалдык жардам көрсөтүүнү дагы сунуштады.

Ал эми Sputnik Кыргызстан агенттиги видеонун каарманын таап, жашоо-шарты тууралуу кабар алды. Өзүн Махабат Бейшеналы кызы деп тааныштырган 22 жаштагы келин үч баланын энеси экен. Балдарынын улуусу үч, ортончусу бир жашта болсо, кенжеси бир айлык. Ал унаа жуучу жайда иштеген жолдошуна жардам берет экен.

"Бул видеону 17-июнь күнү тартышыптыр. Кичүү баламды таштаганга киши жок, өзүм менен алып алгам. Мен унааны жууп жатканда балам ыйлап калып, кардарлардын бири аны соороткон. Ошол адамга ыраазычылыгымды билдирем. Бирок мындай көрүнүш бир гана жолу болду", — деди Махабат.

Жолдошу Элназар дагы 22 жашта. Жаш үй-бүлө унаа жуучу жайга жакын жерде жашайт. Ал эми жубайлар иштеп жатканда балдарды чоң энеси карап турат.