Жээнбеков Нарында болгон чырды ИИМ башчысына жеке көзөмөлүнө алууну тапшырды

БИШКЕК, 9-июн. — Sputnik. Премьер-министр Сооронбай Жээнбеков тиешелүү мамлекеттик органдарга Борбор Азия университетинде (БАУ) болгон окуяны иликтеп, ага мыйзам чегинде баа берүүнү тапшырды. Бул тууралуу өкмөттүн маалымат кызматы билдирди.

Премьер чырдын катышуучуларына мыйзам чегинде баа берилиши керектигин баса белгиледи.

"Билим берүү жана илим министри Гүлмира Кудайбердиева БАУ жетекчилиги менен биргеликте мындай окуяларды кайталабоонун үстүнөн иш алып барууга милдеттендирилди. Ички иштер министри Улан Исраиловго коомдук тартипти сактоо жана мындай мыйзам бузууларга жол бербөөнүн, жарандардын коопсуздугун камсыз кылуунун алдын алуу жана Нарын шаарындагы БАУдагы болгон окуяны жеке көзөмөлгө алууну тапшырды", — деп айтылат маалыматта.

Жээнбеков жергиликтүү калк, анын ичинде жаштар арасында түшүндүрүү иштерин жүргүзүүнүн маанилүүлүгүн эскертип, тиешелүү мамлекеттик органдар окуяны кылдат иликтеп, ага мыйзам чегинде баа бериши керектигин белгиледи.

"Мындай жагымсыз окуялар өлкөнүн аброюна шек келтириши ыктымал, бардык келип чыккан конфликт мыйзам чегинде чечилиши керек. БАУ алдыңкы ЖОЖ гана эмес, Борбор Азия аймагында билим менен маданияттын борбору болушу керек", – деди Жээнбеков.

Белгилей кетсек, окуу жайдын студенттери менен жергиликтүү жаштар элдешип, мындан ары биргеликте иш алып баруунун маанилүүлүгүн белгилешкен.