БИШКЕК, 7-апр. — Sputnik. Премьер-министр Сооронбай Жээнбеков Ош облусуна болгон иш сапарынын алкагында 2010-жылдагы апрель окуясынын катышуучулары менен жолукту. Бул тууралуу өкмөттүн маалымат кызматы кабарлады.
Мында өкмөт башчы элдик революция өлкөнүн өнүгүүсүнө жаңы мүмкүнчүлүктөрдү жаратканын баса белиледи.
"Азыр республикалык бюджеттин кирешеси 2009-жылга салыштырмалуу эки эсе өстү. Энергетика, айыл чарба, билим берүү, өнөр жай, саламаттыкты сактоо жана социалдык тармактарда ири долбоорлор ишке ашууда. Эң негизги жетишкендигибиз — энергетикалык көз карандысыздыкка ээ болдук", — деди премьер-министр.
Мындан сырткары, өкмөт башчы Апрель элдик революциясынын катышуучуларына президентинин жана өзүнүн атынан ыраазычылык билдирди. Ошондой эле Ош, Баткен жана Жалал-Абад облустарынын бир катар жарандарына өкмөттүн атайын сыйлыктарын тапшырды.
