БИШКЕК, 28-мар. — Sputnik. Кадамжайдын Пүлгөн айылында автокырсыкка кабылган жоокерлердин бешөө реанимацияда жатат. Бул тууралуу Sputnik Кыргызстан агенттигине Кадамжай аймактык ооруканасынын башчысы Эркин Аппазов билдирди.
Эске сала кетсек, кечээ күнү Ош — Баткен жолунун 123-чакырымында жоокерлер бара жаткан КамАЗ бир үйдү сүзүп, жарым-жартылай кирип кеткен.
"Бир жоокерге операция жасалды. Бирок абалы оор бойдон калууда. Мындан сырткары, беш адам оор абалда реанимацияда жатат. Калган аскерлер ар кыл жаракаттарды алган. Тиешелүү жардамдар көрсөтүлүүдө ", — деди Аппазаов.
Саламаттык сактоо министрлиги Ош облустар аралык ооруканасынан жабыркагандарга жардам көрсөтүү үчүн дарыгерлер бригадасы (нейрохирург, реаниматолог, уролог, травматолог) санитардык авиация менен чыгып кеткендигин билдирди.
