НАРЫН, 6-фев. — Sputnik. Нарын шаарынын 50гө чукул тургуну борбордук аянтка нааразычылык акциясына чыгып, кышкысын калкка 2000 кВт саат электр энергиясын 77 тыйындан берүүнү талап кылышты. Бул тууралуу Sputnik Кыргызстан агенттигинин аймактык кабарчысы билдирди.
Маалыматка ылайык, учурда нарындыктарга октябрдан апрель айына чейин 1000 кВт саат электр энергиясы жеңилдик менен 77 тыйындан берилип келет. Эгер кардар лимиттен ашып кетсе ар бир киловатт саат үчүн 2 сом 16 тыйындан төлөйт.
"Нааразы болгондор быйыл кыш өзгөчө суук болуп, эл лимиттен ашык электр энергиясын пайдаланып жатканын айтышты. Андыктан анын акчасы көп чыгып, төлөөдө кыйналып жатабыз дешти. Мындан улам өкмөттөн 2000 кВт саат жеңилдик берүүсүн талап кылып, ал аткарылбаса мөөнөтсүз митингге чыгабыз дешүүдө", — деп аймактык кабарчы билдирди.
Нааразы болгондор Нарын шаарында 10 миң абоненттин үч миңи 1000 саат лимиттен ашык электр энергиясын пайдаланышканын билдиришкен.
Аларды өкмөттүн Нарын облусундагы өкүлү Аманбай Кайыпов кабыл алып, сунуштарын жана көйгөйлөрүн уккан. Эл кийинки жылы 2000 кВт саат электр энергиясын жеңилдетилген түрдө берүүнү сурануу менен тарап кетишкен.
Коомдук тартипке 20дай милиция кызматкери көз салып турушкан.
