БИШКЕК, 27-дек. — Sputnik. Ошко жаңы аба майдан курулат деген сөз көптөн бери эле айтылып келет. Жакында "Ош" эл аралык аэропортунда тумандын улам үч күнгө каттамдар токтогондо бул маселе Жогорку Кеңеште дагы бир нече ирет көтөрүлдү. Мындан тышкары, учурда учактар коңшу Өзбекстандын аба мейкиндиги аркылуу учуп-конуп, бул дагы чоң көйгөйдү жаратып келет. Мындан улам Sputnik Кыргызстан агенттиги жаңы аэропорт салууга өлкөнүн чама-чаркы жетеби жана мунун канчалык зарылчылыгы бар деген суроолорго жооп издеди.
Транспорт жана жол министрлиги менен байланышканыбызда мекеменин маалымат кызматы аэропорт курууга учурда Отуз-Адыр, Мады айыл өкмөттөрүнүн аймагынан 500 гектар жер бөлүнгөнүн айтты.
"Ошко жаңы аэропорт куруу боюнча 2015-жылдын март айында министрлик тарабынан түзүлгөн атайын ведомстволор аралык комиссия жер тилкесин таап, тиешелүү корутундусун өкмөткө берген. Азыркы убакта жогорудагы тилкени трансформациялоо боюнча тиешелүү иштер жасалууда. Ошону менен катар эле министрлик "Манас эл аралык аэропорту" ишканасы менен биргеликте жаңы аэропортту курууга инвестор тартуу үстүндө иш алып барууда. Буга чейин Кытай инвесторлору кайрылып, аларга тиешелүү маалыматтар берилген. Бирок бүгүнкү күндө реалдуу түрдө инвестиция салабыз деген тараптар жок", — деп билдирди маалымат кызматы.
Аталган министрлик учурда аба майдан курууга канча каражат кетери аныктала электигин белгиледи.
Бул маселени демилгелеп жаткан Жогорку Кеңештин депутаты Искендер Матраимов аба майданды көчүрүү мезгилдин талабы болуп жатканын жана аны курууга инвесторлорду да таба аларын айтат.
Ал эми өкмөттүн Ош облусундагы өкүлчүлүгүнүн регионалдык бөлүм башчысынын милдетин аткаруучу Райымберди Мөнөкбаев учурда бөлүнгөн жерлерди трансформациялоо боюнча Кара-Суу райондук администрация, архитектура башкармалыгы жана айыл өкмөт башчылары иш алып барып жатканын айтты.
"Ал аймакта мамлекеттин карамагындагы жерлерден сырткары, турак жай курууга жана үлүшкө берилген жер тилкелеринин аянты такталат. Учурда жерди транформациялоо иштери гана жүрүп жатат. Азырынча инвестиция салууга кызыкдар тарап жок болгондуктан, курулуш иштери качан башталары белгисиз", — деп билдирди Мөнөкбаев.
Эл аралык Ош аэропорту Фергана өрөөнүндөгү ири аба майдандарынын бири, пайдаланууга 1974-жылы берилген. КРдин аймагындагы көлөмү боюнча экинчи аэропорт, жылына 1 миллионго жакын жүргүнчүнү кабыл алат. Аба ырайынын катаал шарттарында Бишкек шаарындагы "Манас" эл аралык аба майданына кошумча кызмат көрсөтөт. Ош шаарынын түндүгүнөн 9 чакырым аралыкта жайгашкан.
