Казакстандык аткаруучу Димаш Кудайберген (Кудайбергенов Динмухаммед Канатович) 1994-жылы 24-майда Актөбө шаарында туулган.
Чыгармачыл адамдардын үй-бүлөсүнөн чыккан. Энеси Светлана Айтбаева профессионалдуу ырчы, көп жылдан бери Актөбө филармониясында эмгектенет. Атасы Канат Айтбаев "Жибек" музыкалык ансамблинде ырдаган, учурда Димаштын продюсери. Өзүнөн кийин Раушан аттуу карындашы жана Абилмансур аттуу иниси бар.
Димаш сахнага биринчи жолу эки жашында чыгып, беш жашынан тарта музыкалык мектепте тарбиялана баштаган.
2014-жылы Актөбө музыкалык колледжин аяктаган. Андан соң Астанадагы Казак улуттук искусство университетинин эстрада факультетине тапшырган.
Чыгармачылыгы
Димаштын тембри — лирикалык тенор. Үнүнүн диапазону 6 октава экендиги айтылат. Ырчы чыгармаларды орус, англис, француз жана башка тилдерде аткарат. Дүйнөлүк чыгармалардан сырткары өзүнүн калемине таандык ырларды да аткарып келет.
Жетишкендиктери:
2010-жылы — эл аралык "Байкоңурдун шаңкылдаган үндөрү" фестивалынын жеңүүчүсү;
2012-жылы — "Жас канат" республикалык сынагынын баш байге ээси. Ушул эле жылы "Чыгыш базары" конкурсунда сыйлык алган;
2013-жылы — Кыргызстанда өткөн "Мейкин Азия" жаштар сынагынын жеңүүчүсү;
2015-жылы — "Славян базары" ыр сынагын уткан;
2017-жылы — Кытайда өткөн "I am a singer" шоусунда экинчи орунду алган.
Ошондой эле 20дан ашык сыйлыктын ээси. Алардын ириси кытайлык Top Chinese Music Awards сыйлыгынын "Азиядагы эң белгилүү" ырчы номинациясы. Бул "Грэмми" сыйлыгына тете.
Жаш аткаруучу таасирленген таланттары Майкл Жексон, Ермек Серкебаев, Селин Дион, Лара Фабиан, Лучано Паваротти экендигин айтып келет.
