БИШКЕК, 10-янв. — Sputnik. Бишкек шаарынын Октябрь райондук соту Азимбек Бекназаров, Ахматбек Келдибеков жана Кеңешбек Дүйшебаевдин экс-президент Алмазбек Атамбаев менен "Апрель" телеканалынын директору Дмитрий Ложниковдун үстүнөн жазган арызын сот өндүрүшүнө алган жок. Бул тууралуу доогерлердин бири Азимбек Бекназаров Sputnik Кыргызстан агенттигине билдирди.
Анын айтымында, райондук сот арызга тиркелген айрым документтер толук эмес экенин айтып, арызды кайтарган.
"Биздин өкүл сот айткан документтерди толуктап туруп кайтадан сотко арыз берет. Болбогон нерселерди шылтоолоп жатышат. Мисалы, арыз бергенде төлөгөн мамлекеттик алымдын түп нускасын эмес, көчүрмөсүн тиркептирсиңер деп жатышат", — деди ал.
Мурдагы аткаминерлер экс-президенттин "Апрель" телеканалына берген маегинен улам сотко кайрылып, 18 миллион сом өндүрүүнү көздөшүүдө. Доогерлердин ар бири 3 миллион сомдон талап кылууда.
Алмазбек Атамбаевдин "Апрель" телеканалына берген маегинин тексттик трансляциясын бул жактан окуңуз.
