БИШКЕК, 26-сен. — Sputnik. Президент Сооронбай Жээнбеков 25-сентябрда Нью-Йорк шаарында Бириккен Улуттар Уюмунун Башкы ассамблеясында сөз сүйлөдү. Бул тууралуу өлкө башчынын маалымат кызматы билдирди.
Сооронбай Жээнбеков Бириккен Улуттар Уюмунун бийик трибунасынан Кыргызстандын көз карашы боюнча бышып жетилген жана биргелешип чечүүнү талап кылган улуттук, регионалдык жана глобалдык деңгээлдеги көйгөйлүү маселелерге токтолду.
"Дүйнө жүзүндөгү глобалдык саясий, экономикалык жана экологиялык кырдаал тез өзгөрүүдө. Дүйнөлүк саясатта регионализм тенденциясы күч алууда. Баалардын өсүшү, өтүмдүүлүктүн жетишсиздиги жана экономикадагы санкциялар "согушу" уланууда. Терроризм жана экстремизм коркунучу бардык өлкөлөрдү кучагына алды. Экологиялык тең салмактуулукту сактоо бүт планетанын глобалдык милдетине айланды", — деди Жээнбеков.
Өлкө башчысы Кыргызстан үчүн бул процесстер сезилерлик болгонун кошумчалады.
Жээнбеков андан сырткары, Кыргызстан парламенттик демократияны өнүктүрүүнү көздөй турганына токтолуп, 2020-жылы боло турган парламенттик шайлоо муну дагы бир ирет ырастай турганын айтты.
Ошондой эле коррупцияга каршы күрөш Кыргызстандын мамлекеттик саясатынын артыкчылыктуу багыты бойдон калганын, эртеңки күндүн талаптарына ылайык саясий модернизациялоо жана экономиканы өнүктүрүү милдеттери турганын кошумчалады.
"Биринчи кезекте биз сот-укуктук реформаны ишке ашырууну жана күч структураларын кайра уюштурууну көздөйбүз. Региондорду өнүктүрүү — Кыргызстандын ийгиликтүү өнүгүшүнүн кепили жана өлкөбүз үчүн эң актуалдуу маселе боюнча калууда", — деди ал.
Президент Кыргызстан демократиялык принциптерди ырааттуу түрдө бекемдөө ишин улантарын белгиледи.
