БИШКЕК, 15-ноя. — Sputnik. Кыргызстанды туруктуу өнүктүрүү боюнча улуттук кеңештин жыйынында президент Алмазбек Атамбаев Евразиялык экономикалык биримдиктеги абалды жана кыргыз-казак чек арасындагы кырдаалды сынга алды.
Ал бизнести өнүктүрүү үчүн чоң рынок керектигин, андыктан Кыргызстан ЕАЭБге чоң үмүт артып киргенин айтты. Атамбаев бул туура чечим болгонун жана өлкө биримдикте калышы керектигин белгиледи.
"Күн сайын Россия менен Казакстандын ЖМКларын окуйм. Алар Атамбаев ЕАЭБди бузууга аракет кылып жатат деп жазышууда. Бул акылга сыйбаган нерсе. Кыргызстан биримдиктен чыкпайт жана чыгайын деген ою да жок", — деди Атамбаев.
Ал өз сөзүндө иш жүзүндө Кыргызстан бир айдан ашык мөөнөттөн бери Евразиялык экономикалык биримдиктен ажырап калганын айтты.
Президент белгилегендей, Казакстандын жетекчилигинин аракети жана Евразиялык экономикалык комиссиянын эч нерсе кылбай жатышы биримдиктин аброюна доо кетирип жатат.
"Кагазда көрсөтүлгөн нерселердин бардыгы иштебей, кайсы бир падышанын кесирлиги болгон жерге кимдин кошулгусу келет?" — деп суроо салды Атамбаев.
Өлкө башчы ошондой эле 2014-жылы дагы бир коңшу мамлекеттин президентинин кесирлигинен Кыргызстандын түштүгү газы жок калганын айтты.
"Анда мени карып калган диктаторго тизелеп барып кел деп айтышкан. Бирок андай болбойт, биз өзүбүздү сыйлабасак бизди ким сыйлайт", — деди Атамбаев.
Ал өз кезегинде жаңы шайланган президентти, премьер-министрди, Жогорку Кеңештин төрагасын мындай иштерге барбагыла деп чакырды.
Атамбаев ошондой эле Кыргызстан 2010-жылкы, 2014-жылкы энергетикалык чектөөнү баштан кечиргенин айтып, азыркы кыйынчылыкты да жеңил эле баштан кечирерин баса белгиледи.
