БИШКЕК, 7-июн. — Sputnik. Кыргызстандын тышкы иштер министри Эрлан Абдылдаев Катардын ыйгарым укуктуу элчиси Мухаммед Аль-Наими менен жолукту. Бул тууралуу ТИМ билдирди.
Маалыматка ылайык, жолугушуу 6-июнь күнү болуп, элчи Катардагы абал боюнча түшүндүрмө берди.
Эскерте кетсек, 5-июнда Бириккен Араб Эмирлиги, Бахрейн, Сауд Аравиясы жана Египет Катар менен дипломатиялык мамилелерди токтотконун жар салган. Аталган мамлекеттер Катар "Ислам мамлекети" жана "Аль-Каида" террордук топторун колдоп, араб өлкөлөрүнүн ички чарбасына кийлигишет деп кине коюуда. Андан сырткары, Катарга болгон бардык аба, жол жана деңиз каттамдарына тыюу салынды. Буга кошумча транзиттик аба каттамдары дагы чектелген.
"Министр Абдылдаев Катардагы абал боюнча кабатыр болуп жатканын айтып, Кыргызстан Булуң өлкөлөрү менен болгон достук мамилени сактоого, аймакта тынчтык өкүм сүрүүсүнө кызыкдар экенин билдирди", — деп жазылат маалыматта.
Мындан сырткары, кыргыз дипломаты учурдагы жагымсыз жагдайды чечүүдө тараптар акылга таянып, Булуң өлкөлөрүндөгү элдин кызыкчылыгын эске алат деп үмүттөнөрүн кошумчалады.
