БИШКЕК, 26-окт. — Sputnik. Президент Алмазбек Атамбаев Өзбекстандын өлкө башчысынын милдетин аткаруучу Шавкат Мирзиёев менен телефондон байланышканын мамлекет жетекчисинин маалымат кызматы билдирди.
Сүйлөшүү учурунда тараптар кыргыз-өзбек мамилелеринин абалы менен келечегин талкуулашты.
Эскерте кетсек, эки өлкөнүн ортосундагы чыңалган мамиле бийликке Шавкат Мирзиёевдин келиши менен жумшарып, чек ара көйгөйү сыяктуу маселелерде жылыш байкала баштаган.
Мындан тышкары, бүгүн Кыргызстанга Өзбекстандын өкмөт башчысынын орун басары Адхам Икрамов башында турган делегация Ош шаарына келип, аларды "Достук" көзөмөл өткөрүү жайынан биринчи вице-премьер Мухамметкалый Абулгазиев, вице-премьер Жеңиш Разаков баш болгон аткаминерлер тосуп алды.
Буга чейин Кыргызстандын вице-премьери Абулгазиев баштаган делегация 1-октябрда өзбек тараптын чакыруусу боюнча Анжиян облусуна барган. Анда кыргыз-өзбек чек ара кызматташтыгын өнүктүрүү маселеси талкууга алынган. Коомчулукта бул кыргыз-өзбек алакаларынын жакшырышынын желаргысы катары бааланган.
