Абулгазиев жетектеген Кыргызстандын делегациясы 1-октябрда Өзбекстандын чакыруусу менен Анжиян шаарындагы кыргыз-өзбек чек ара кызматташтыгын өнүктүрүү боюнча иш-чараларга катышып келди.
"Максат — эки элдин, мамлекет ортосундагы мамилени мындан ары өркөндөтүү болду. Иш сапардын жыйынтыгында түштүк региондогу – Ош, Баткен, Жалал-Абад облусунун жетекчилери, Ош шаарынын мэри жана Анжиян, Фергана, Наманган облустарынын башчылары кызматташуу меморандумуна кол коюшту", — деди биринчи вице-премьер.
Жолугушууда бир катар маселелер талкууланган.
"Анжиянда экономикалык, социалдык-гуманитардык, маданияттар ортосундагы кызматташууну арттыруу каралды. Андан сырткары, жарандар арасындагы маселелерди кандай кылып чечүү, андагы жетишкендиктер менен мүчүлүштүктөр талкууланды",— деп билдирди Абулгазиев.
Тараптар чектеш аймактардагы тургундардын көйгөйлүү маселелерин талкуулоо үчүн айына бир ирет жолугушууларды такай өткөрүп турууну макулдашты.
Абулгазиев өзбекстандык делегацияны тосуу кезеги эми Кыргызстанга экендигин, кийинки жолугушуу Ош же Жалал-Абад шаарында болушу мүмкүндүгүн кошумчалады.
