БИШКЕК, 29-янв. — Sputnik. Коронавирустун жаңы түрүнүн жайылуу динамикасы эң аз дегенде дагы эки жумадай активдүү болорун Новосибирск университетинин бионанотехнология, микробиология жана вирусология лабораториясынын башчысы Сергей Нетесов билдирди. Бул тууралуу РИА Новости жазып чыкты.
"Бул вирус 2003-жылдагы типтүү пневмония вирусуна караганда, алсызыраактай, бирок мунун таралышы өтө тездик менен жүрүүдө. Оору жуктургандардын саны азыр эле беш миңге жетти. Таралуу динамикасы эки жумадай активдүү болуп, дагы кайсы бир убакка чейин кармалып турат", — деди Нетесов.
Ал белгилегендей, Кытайда коронавируска каршы болуп көрбөгөндөй чаралар көрүлүүдө, коңшу өлкөлөрдө да даярдыктар бар.
"Азыр 2003-жылга караганда илимий даярдык жогору. Бул вирустун сасык тумоодон айырмасы инкубациялык мезгилинин узактыгында. Башкача айтканда, вирус жуккан адамда кайсы бир убакка чейин оорунун белгилери билинбейт. Бул кырдаал аягына чейин иликтене элек. Азыр эксперттер оорунун инкубациялык мезгилин тактоодо", — деди ал.
Декабрдын аягында Кытай бийлиги Ухань шаарында белгисиз бир вирустун таралышы боюнча билдирген. Биринчилерден болуп оору жуктургандардын деңиз азыктары сатылган базар менен байланышы болгон. Адистер дарттын козгогучу коронавирустун 2019-nCoV деп аталган жаңы тиби экендигин боолголошкон. Акыркы маалыматтар боюнча, коронавирусту жуктуруп алгандар алты миңге жетти, алардын ичинен 132 адам көз жумду. Оору Кытайдан башка Гонконгдо, Макаодо, Тайванда, Таиландда, Японияда, Түштүк Кореяда, АКШда, Канадада, Вьетнамда, Сингапурда, Непалда, Францияда, Австралияда, Малайзияда жана Германияда катталган.
