БИШКЕК, 31-июл. — Sputnik. Каракол суусу нугунан чыгып, тегерегиндеги турак жайларды каптап кетүү коркунучунан улам 27 үйдүн жашоочулары коопсуз жайга көчүрүлдү. Бул тууралуу ӨКМдин маалымат кызматынан кабарлашты.
Ташкындаган суу жээктеги бак-дарактарды тамыры менен агызып кеткен жана бир көпүрөнү жарым-жартылай зыянга учураткан. Шаардагы паркты да суу каптаган.
"Каракол суусунун кооптуу тилкелерин аныктоо максатында 24 куткаруучу жана шаардык мэриянын кызматкерлери менен биргеликте иш алып барып жатат", — деп кабарлады ӨКМден.
Маалыматта Каракол шаардык жарандык коргоо кызматтарынын инженердик техникалары иш алып барып жатканы кабарланды.
