БИШКЕК, 14-апр. – Sputnik. Бишкекте 23 жаштагы кыз милицияга баш ийбегени үчүн 15 суткага тергөө абагына киргизилди. Бул тууралуу комендатурадан билдиришти.
Маалыматка караганда, милиционерлер 11-апрель күнү саат 17:30да "Орто-Сай" базарынын аймагындагы Юнусалиев менен Сүйөркулов көчөлөрүнүн кесилишинен медициналык бет кап кийбей кетип бараткан кызга түшүндүрүү иштерин жүргүзүү үчүн токтотушкан.
“Жаран милициянын мыйзамдуу талаптарына баш ийбей, орой формада жооп кайтарган. Коомдук тартипти бузуу менен өзүн агрессивдүү алып жүргөн. Ошондой эле милиция кызматкерлерине каршылык көрсөтүп, күч колдонгон”, — дешти комендатурадан.
Милиционерлердин кызга кандай талап койгону айтылган жок. Буга чейин Бишкектин коменданты Алмаз Орозалиев бет кап кийбегендерге жаза каралбаганын расмий жарыялаган болчу.
Белгилей кетсек, Кыргызстанда коронавирус аныкталган адамдардын саны 430га жетти. Катталган учурлардын ичинен 230у аял, 200ү эркек.
Бишкек, Ош, Жалал-Абад шаарлары менен Сузак, Кара-Суу, Ноокат райондоруна 25-марттан 15-апрелге чейин өзгөчө абал киргизилген.
Өлкөдө учурда абал кандай болуп жатканын Sputnik Кыргызстан агенттиги жүргүзгөн тексттик трансляциядан билүүгө болот.
Кабарларды ыкчам, ыңгайлуу шартта окуу үчүн Telegram-каналыбызга баш багыңыз.
