БИШКЕК, 21-дек. — Sputnik. Кыргызстандын социал-демократтар партиясы Улуттук коопсуздук мамлекеттик комитетинин мурдагы премьер-министр Сапар Исаков боюнча тараткан билдирүүсүнө комментарий берди.
Партия өкүлдөрүнүн айтымында, УКМК Бишкек ТЭЦиндеги авария, аны модернизациялоо иштеринин жүрүшүндө болду, ага Исаков күнөөлүү деп элди адаштырып жатат.
"Парламенттик комиссия, башка дагы компетенттүү органдар ТЭЦтеги авария анын эски бөлүгүндө болгонун аныктады. Ага ким күнөөлүү экенин учурда Биринчи май райондук соту иликтеп жатат. Бирок Сапар Исаков бул иш боюнча же күбө катары, же соттолуучу катары суралып жаткан жок. Исаковдун аварияга тиешеси жок, ага мындай айыптоо тагылган эмес", — деп КСДПдан белгилешти.
Социал-демократтар УКМКнын билдирүүсүн сотко басым көрсөтүү катары баалады.
Партиядан белгилешкендей, Исаков УКМКнын убактылуу кармоочу жайында отурган мезгилден бери аны менен эч кандай тергөө иш-чаралары жүргүзүлгөн эмес. Демек укук коргоочулардын ага карата эч кандай далили жок.
Исаков Бишкек ТЭЦин модернизациялаган Кытайдын ТВЕА компаниясынын кызыкчылыгын таңуулаган деп айыпталууда. Ал быйыл 5-июнда камакка алынган.
