БИШКЕК, 19-июл. — Sputnik. Бишкек шаарынын мурдагы мэри Албек Ибраимов кармалгандыгы тууралуу УКМКнын маалымат кызматынан билдиришти.
Маалыматка караганда, Ибраимов буга чейин бир нече жолу суракка чакырылган.
"Бүгүн бейшембиде Бишкек шаарынын мурдагы жетекчиси Албек Ибраимов УКМК тарабынан кармалып, башкы тергөө башкармалыгына жеткирилди. Ал тергөөчүгө коркутуу менен жооп берип, курал колдоно турганын билдирген" — деп айтылат маалыматта.
"ТНК Дастан" ААКсынын буюм сатып алууда жогорулатылган бааны көрсөтүү менен мекчиктештирилген каражаттары боюнча Кылмыш жаза кодексинин 171-беренесинин (ишенип берилген мүлктү ыйгарып алуу же төлөмөр болуу) негизинде кылмыш иши козголгон.
Билдирмеге ылайык, иликтөө маалында Ибраимов аталган ишкананын башкармалыгынын төрагасы болуп туруп, коргонуу багытындагы каражатты сатып алуу үчүн ири суммадагы каражат кетчү келишим түзгөн. Мындан соң ал товар жеткирип берген тараптан акчалай сыйлык катары 270 миң доллар алганы айтылат. Ушул эле кылмыш иштин алкагында "Солнечный берег" пансионатын сатууда "ТНК Дастан" ААКсы 152 миллион сом чыгым тартканы аныкталган.
Ошондой эле жер тилекелерин берүүдөгү коррупциялык фактылар боюнча да кылмыш иши козголгон. Анда Албек Ибраимов Бишкек шаарынын мэри болуп турганда өзүнүн жана башка тараптардын материалдык пайдасы үчүн коррупциялык схема уюштуруп мыйзамсыз түрдө жер тилкелерин берип жибергени айтылат. Тагыраагы, 2017-жылы Ибраимовдун түздөн-түз тапшырмасы менен конкурс өтүп, Бишкектин түштүк тарабындагы аянты беш гектардан ашык эки жер тилкеси ортомчулардын атына катталган. Муну менен аталган жер тилкелери үчүнчү тарапка кымбат баада сатылып кеткени белгиленди.
