БИШКЕК, 5-май — Sputnik. Нарын облусунун Кочкор районундагы Кувакы ашуусунда Mazda автоунаасы бетон тосмону сүзүп, анын кесепетинен 10 жаштагы бала көз жумду. Бул туурасында ИИМдин жол кыймылы коопсуздугун камсыздоо боюнча башкармалыгынан кабарлашты.
Маалыматка караганда, баланын өмүрүн алган окуя кечээ, 4-майда болуп, айдоочу ооруканага жеткирилген, бирок эсине келе элек.
"Алдын ала маалыматтарга таянсак, 50 жаштагы айдоочу автоунааны башкара албай калып, темир тосмону барып сүзгөн. Автоунаанын ичиндеги 10 жаштагы бала ошол жерден мүрт кеткен", — деп айтып беришти милициядан.
Каза тапкан бала денесинин ар жеринен жаракат алып Кочкор райондук ооруканасына жеткирилген айдоочунун уулу экендиги айтылууда. Кырсык боюнча топтолгон материалдарды автоинспекторлор аталган райондук милициясынын тергөө бөлүмүнө өткөрүп берген.
Кечээ 4-май күнү, Бишкекте да жол кырсыгы болуп, эки автоунаа кагышып, бири ала салып кеткен. https://sputnik.kg/video/20180504/1038980851/bishkek-shaary-zhol-kyrsygy.html
