БИШКЕК, 7-фев. — Sputnik. Өзү абакта отуруп алып телефон аркылуу жарандарды 600 миң сомго отургузган шылуун 16 жылга кесилди. Бул туурасында Ош ШИИБдин маалымат кызматы билдирди.
Кармалган киши 37 жаштагы Ноокат районунун тургуну. Ал буга чейин тогуз жолу соттолгону маалыматта айтылат.
"Ал абакта отуруп алып телефон аркылуу жети адамды 600 миң сомго алдаган. Акчаларын кылмыштуу шериги болгон 28 жаштагы аял аркылуу алып турган. Кылмышкер ар кимге телефон чалып туугандары кырсыкка кабылганын жана тез арада акча керек экенин айтып алдап келген. Ага ишенгендер анын шеригине сураган акчасын жөнөтүп турушкан", — деп айтылат маалыматта.
Анын кылмыштуу шериги болгон 28 жаштагы аял да колго түшүрүлгөн. Ал мындан башка да кылмыш иштерге шектелип, тергөө иштери жүрүп жатат.
Соттолгон жаран төмөндөгүдөй ыкмаларды колдонуп акча өндүрүп жүргөн:
1. Оштун Ак-Тилек кичи шаарчасында жашаган 62 жаштагы кишини "балаңыз машина менен бирөөнү сүзүп өлтүрүп алды, тез арада Ош шаарынын Касымбеков көчөсүнө 70 миң сом акча алып келиңиз" деп алдаган;
2. Ушундай эле жол менен Ак-Тилек кичи районунда жашаган 61 жаштагы аял да 70 миң сомун алдырткан;
3. Ноокат районунун 57 жаштагы тургунуна чалып "мен сиздин балаңызмын, бирөөнү машина менен сүзүп алдым. Тез арада акча таап бериңиз, андан кутулушум керек" деп өңгүрөп ыйлап, 60 миң сом, 35 миң рубль сураган. Ага ишенген эне акчасын айткан жерине жеткирип берген;
Мындан улам шаардык милиция мындай учурларда акча берүүгө ашыкпай, мааалыматтын чын-төгүнүн тактап, алгач жабыркады деген адамдын өзү менен байланышууну эскертет.
Ал эми мындан бир ай мурда Бишкекте кемпирдин ишеничине кирип 8 миң доллар акчасын алдап кетти делген Пакистандын жараны кармалган.
