БИШКЕК, 24-янв. — Sputnik. Жети-Өгүз районунун Жети-Өгүз айыл аймагында аңчылыкка чыгып, кар көчкүдө калган 39 жаштагы жаранды издөөгө бүгүн, 24-январда таңкы саат 5:45те 52 куткаруучу жана 50 жергиликтүү тургун чыгып кетишти. Бул тууралуу ӨКМдин маалымат кызматынан кабарлашты.
Эске салсак, кечээ, шейшемби күнү саат 17:00дөр чамасында Көк-Жайык жайлоосунун Телти участогунда кар көчкү түшүп, ал аймакта жүргөн үч адамдын бирин басып калган.
Алар аталган жерде отун чогултуп жүргөнү айтылган.
"23-январь күнү саат 20.20га чейин жеринде 50гө чукул адам иштеп, кар басып калган жаранды табышкан эмес. Бүгүн таң эртеден башталган издөө иштерине 52 кесипкөй куткаруучу, жергиликтүү 50 тургун тартылды", — деп айтылат билдирүүдө.
Маалыматка караганда, кар көчкүнүн болжолдуу көлөмү 155 миң куб метр.
