Бишкекте журналисттин эшигин талкалап үйүнө кирүү аракети болду

БИШКЕК, 19-ноя. — Sputnik. Белгисиз адам Sputnik Кыргызстан агенттигинин жооптуу редактору Айида Батырбекова жашаган үйдүн эшигин талкалап кирүүгө аракет жасады.

Бүгүн, 19-ноябрда, болжол менен түшкү саат 12.30дарда Батырбекованын Бөкөнбаев көчөсүндө жайгашкан үйүнө белгисиз адам келип эшигин темир таяк менен чапкылап ачууга аракет кылган. Бул учурда ал үй-бүлөсү менен үйдүн ичинде болгон.

Бирок милиция кызматкерлери барганга чейин кылмышкер качып кеткен. Эшигинде таяк менен урган издери калып, туткасы түбүнөн сынып кеткен. Ал жерде кылмышкердин темир таягы жана бир баштыгы калган.

"Бул үйдү жакында эле алганбыз. Мурунку кожоюнунун баласынан күмөн санап жатам. Анткени ал психиатриялык ооруканада жаткан жеринен качып кеткен экен", — деди Батырбекова.

Учурда укук коргоо органдары бул боюнча иш алып барууда.