БИШКЕК, 2-июл. — Sputnik. Таң эртеден тарта Чолпон-Атадагы "Рух Ордо" маданий борборунда башталган бомба издөө иши дагы деле уланып жатат. Бул туурасында Sputnik Кыргызстан агенттигине Ысык-Көл облусунун милициясынан билдиришти.
Эскерте кетсек, белгисиз бирөөлөр таңкы саат алтыларда аталган жайга бомба коюлгандыгын билдиргенден кийин, райондук милициянын кызматкерлери тез арада "Рух Ордого" чыгып кеткен.
Издөө иштери азырынча жыйынтыгын бере элек.
"Комплекстин аймагы толугу менен тосулду. Ал жерде Бишкек шаарынан келген кинологдор менен саперлор иштеп жатышат",— деп билдирди милициянын өкүлү.
Ал УКМКнын кызматкерлери аймакты түрө текшерип жүргөндүгүн, андыктан издөө иштери качан аяктары белгисиз экендигин кошумчалады.
