БИШКЕК, 23-мар. — Sputnik. Кайгуул милициясынын кызматкерин капотко жаткырган боюнча унаасын айдап кеткен айдоочунун иши тергелип жатканын аталган мекеменин маалымат кызматы билдирди.
Буга чейин соцтармактарга айдоочу айым менен инспекторрдун ортосунда 20-март күнү болуп өткөн окуя жарыяланып кеткен. Андагы маалыматка караганда рулда отурган аял милиционерди капотко жаткырган боюнча унаасын айдап кеткен.
"Киев көчөсү менен Манас проспектисинин кесилишинде кызмат өтөп турган инспектор каршы тилкеде кетип бараткан унааны токтоткон. Рулда 29 жаштагы аялдын отурганы белгилүү болду. Ал документин көрсөтүүдөн баш тартып, жолун тоскон милиционерге карабай кетип калууга аракет кылган. Натыйжада инспекторду капотко жаткырган бойдон 2-3 метрге чейин унаасын айдаган", — деп айтылат маалыматта.
Айдоочу Биринчи Май РИИБине алып келинип, тергөө иштери жүрүп жатат.
