БИШКЕК, 16-мар.—Sputnik. Ошто карышкыр кол салган адамды чек арачылар аман сактап калышты. Бул тууралуу Мамлекеттик чек ара кызматынан билдиришти.
Маалыматка ылайык, окуя 15-март күнү эртең менен эрте Алай районунун Терек айылында болгон.
"Иттер үрүп, ызы-чуу болгонунан улам үй ээси мал сарайга кирген. Карышкыр дал ошол маалда кишиге кол салган. Жырткычтан жаркат алган адам эптеп кутулуп чек арачыларга жардамга жөнөгөн", — деп айтылат маалыматта.
Жабыркаган адамга алгачкы жардам көрсөтүлүп, андан кийин аны аскер кызматкерлери Нура айылындагы ооруканага жеткирген. Учурда анын абалы канаттандыраарлык.
Ошол эле күнү чек арачылар тобу жана жергиликтүү жашоочулар "Эгизек" чек ара бөлүмүнөн алыс эмес жерден карышкырды жок кылып, тиешелүү мекемелерге маалымдаган.
