БИШКЕК, 2-фев. — Sputnik. Бишкек шаарындагы Токтогул көчөсү менен Манас проспектисинин кесилишиндеги кафелердин биринин чыга беришинин эки милиция кызматкери 21 жаштагы баланы сабаганын жабыр тарткан жарандын атасы Sputnik Кыргызстан агенттигине билдирди.
Кафедеги видео байкоого эки киши чыгып келе жатканы тартылып калган. Бала кафенин алдында турганда тигил эки кишинин бири аны чыканагы менен бетке чапкан. Бала аларга жооп иретинде сокку узаткан. Бирок экинчи киши баланы буттан чалып жыгып, тепкилеген. Кафеден чыккан он чакты киши окуяга жөн гана көз салып турган. Таяк жеген бала акырында эптеп алардан кутулган.
Бишкек ШИИБдин маалымат кызматы бул окуянын катышуучулары Чүй облусунун Аламүдүн РИИБдин кызматкерлери экенин билдирди.
"Ал кызматкерлер кармалып, иш прокуратурага өттү", — деди ШИИБ.
"Мага Жогорку Кеңештен, прокуратурадан чалып, арызды алууну суранып жатышат. Бирок мен ишти аягына чейин чыгарам. Баламдын жаагы сынып, башынан оор жаракат алды", — деп жабыр тарткан баланын атасы белгиледи.
Ал учурда баласы оор абалда ооруканада жатканын кошумчалады.
