БИШКЕК, 12-окт. — Sputnik. Кара-Кече көмүр кени кадимки калыбында иштеп, бир күндө орто эсеп менен 3500 тоннага чукул көмүр сыртка чыгарылууда. Бул туурасында "Кыргыз көмүр" мамлекеттик ишканасынан кабарлашты.
Маалыматта кен казган жайда абал туруктуу экендиги, калкты камсыздоо үчүн көмүр толугу менен ташылып чыгып жаткандыгы айтылган.
Кечээ, 11-октябрда, "Кыргыз көмүр" мамлекеттик ишканасынын директору Канатбек Ашырбаев Кара-Кече кенине барып, иштин жүрүшү менен таанышып келген.
Кара-Кече кенинде топурак, ташы аралашып жер көчтү. Видео
"Бир күндө "Борбордук" деп аталган тилкеден болжол менен 150-170 автоунаа 3500 тоннадан көмүр ташып чыгууда. Күткөн кезектин мөөнөтү 1-2 суткадан болуп жатат. Алар убактылуу жол менен каттоодо, анткен менен ал аймакта кооптуу жерлер бар", — деп айтылган билдирүүдө.
Учурда көмүр казган тилкеде 15 самосвал, жети экскаватор, бир бульдозер, үч жүктөөчү техниканын иштеп жатканын кабарлашты.
Жумушчулар күнү-түнү казып, ташып кетүүгө 270 000 тонна көмүр даярдалган.
"Убактылуу жолдо автоунаалардын эки тараптан бирдей учурда жүрүшүнө кыйынчылык жаралып, ал эми кээ бир бурулуштар коопсуздук талабына жооп бербейт. Мындан улам кышында кырсык болушу мүмкүн", — деп айтылган маалыматта.
Аталган маселени чечүү үчүн мекеме Транспорт жана жолдор министрлигине кайрылган.
Эске салсак, мындан бир нече күн мурда жер көчкү жүрүп жол тосулуп калгандыктан, көмүр ташуу үчүн убактылуу жол салынган эле.
