БИШКЕК, 12-мар. — Sputnik. Өндүрүштүн токтоп калуусуна жол бербөө максатында өлкөгө импорттук сырьёну ташуу жолун табуу керек. Бул тууралуу вице-премьер Эркин Асрандиев коронавируска байланыштуу өткөн республикалык штабдын кезектеги жыйынында айтты.
Ал калк керектеген товарларды ташуу үчүн бир дагы мамлекет чек араны жаппаганын айтты. Бирок жүк ташуучу унаа айдоочуларынын чек арадан өтүү алгоритмине байланыштуу жүк ташуу агымы токтоп калганын белгиледи.
"Мамлекеттик чек арадан өткөндө ар бир адам келген өлкөсүндө 14 күндүк карантинге алынышы керек. Бул өтө узак процесс. Мындан жарандардын коопсуздугу көз каранды болгондуктан, алгоритмди жеңилдетип же аткарбай коюуга болбойт. Маселени чечүү үчүн башка жолдорун табуу керек", — деди вице-премьер.
Азыркы тапта жүктөрдү убактылуу сактоо кампалары жабык. Чек арада медициналык жана чек ара кызматкерлеринен башка эч ким жок. Жыйындын жүрүшүндө Асрандиев Экономика министрлигине товар ташууга жөндөмдүү альтернативдик өлкөлөрдү издөөнү улантуу тапшырмасын берди.
Ал Бүткүл дүйнөлүк саламаттыкты сактоо уюму тарабынан жарыяланган пандемияга байланыштуу жүк ташуулардын алгоритмине киргизилиши мүмкүн болгон өзгөртүүлөрдү карап чыгуу керектигин айтты.
