БИШКЕК, 21-май — Sputnik. Премьер-министр Мухаммедкалый Абылгазиев Мамлекеттик ипотекалык компанияга 500 000 000 (беш жүз миллион) сом бөлүү жөнүндө буйрукка кол койду. Бул туурасында өкмөттүн маалымат кызматынан кабарлашты.
Бүгүн өкмөттө "Жеткиликтүү турак жай - 2015-2020" программасын ишке ашыруу боюнча кеңешме болгон.
Маалыматтарга таянсак, ипотекалык программа ишке киргенден тартып өкмөт аны каржылоого 4,8 миллиард сомдон ашуун каражат бөлгөн. Ипотекалык насыя боюнча пайыздык үстөктөр бул мезгилде 12-14 пайыздан 7-9 пайызга чейин төмөндөгөн.
"Бүгүн биз ипотекалык насыяны каржылоого 500 миллион сом бөлүп жатабыз. Мүмкүнчүлүктөрдү жана калкты камтууну кеңейтүү үчүн Мамлекеттик ипотекалык компания бюджеттен тышкары кошумча ресурстарды тартуунун натыйжалуу механизмдерин киргизүүсү зарыл. Миңдеген биздин жарандар турак жай алуу жана үй шарттарын жакшыртуу үчүн өз кезегин күтүп жатышат. Биз ипотеканы жарандарыбыз үчүн мындан да жеткиликтүү жана пайдалуу кылууга тийишпиз", — деген Абылгазиев.
Эске салсак, Мамлекеттик ипотекалык компаниянын жетекчиси Бактыбек Шамкеев маалымдагандай, 2019-жылдын 1-апрелине карата 14 өнөктөш банк аркылуу 4,6 миллиард сомдон ашык 4080 насыя берилген. Анын артынан 16 миңге жакын жаран турак жай менен камсыз болгон. Бүгүнкү күндө пайыздык чен 7-9га чейин кыскартылган, эми 6 пайызга чейин төмөндөтүү боюнча иштер жүрүүдө.
Ипотека берген банктардын шарттары туурасында Sputnik Кыргызстан жасаган инфографикадан толук маалымат алууга болот.
