БИШКЕК, 25-янв. — Sputnik. Түркмөнстан Кыргызстандан 60 миң тонна картошка сатып алууга даяр, бирок дыйкандар алар сунуштаган баага ыраазы болбой жатат. Бул тууралуу айыл чарба, тамак-аш өнөр жайы жана мелиорация министринин орун басары Эркинбек Чодуев Sputnik Кыргызстан агенттигинин кабарчысына билдирди.
"Түркмөнстан менен 60 миң тонна картошканы экспорттоо боюнча келишим бар. Бирок баа азыркыдай эле 5 сомдун тегереги болуп жаткандыктан, дыйкандар буга макул эмес", — деди Чодуев.
Анын айтымында, быйыл Кыргызстан сыртка жалпысынан 150 миң тонна картошка чыгарышы зарыл болчу. Буга чейин анын 50 миң тоннасы кардарын тапты.
"Андан тышкары, жакынкы күндөрү Алматынын дүң базарына 6 миң тонна түшүм кетти. Калган 100 миң тоннага жакын картошка сатыла элек. Бул чоң көйгөй", — деди министрдин орун басары.
Былтыр өкмөт Өзбекстан менен ири көлөмдө картошка экспорттоо боюнча келишим түзүлгөнүн айтып, Айыл чарба министрлиги дыйкандарга дал ушул жашылчаны эгүүнү сунуштаган. Ушу тапта карапайым эл 100 тоннага чейин түшүм алгандан кийин татыктуу баада сатып алчу кардар таппай карайлап турат.
Бирок жакынкы күндөрү кайрадан Айыл чарба министрлигине баш бакканыбызда министр "өкмөт картошка баасын көтөрүү үчүн болгон аракетин кылганын, бирок бааны базар аныктай турганын" айтып алакан жайган.
