БИШКЕК, 15-ноя. — Sputnik. Centerra Gold Inc. компаниясынын кыргыз өкмөтү менен былтыркы жылдын сентябрында түзгөн стратегиялык макулдашуусуна азыркы өкмөттүн ичи чыкпайт. Бул тууралуу премьер-министр Мухаммедкалый Абылгазиев Жогорку Кеңештин пленардык жыйынында билдирди.
"Макулдашуунун шарты учурдагы өкмөттүн сынына толбойт. Каражат түшүрүү жаатында позициябызды күчөтүүгө басым жасамакчыбыз. Сүйлөшүү эмне менен бүтө турганын айта албайм, азыр компания биздин талаптарды карап жатат", — деди премьер.
Депутат Айсулуу Мамашова макулдашуунун шарты талашты жаратып жаткан учурда документке эмне үчүн кол коюлганына кызыкты. Ал онкологиялык кызмат боюнча 7 миллион доллар түшкөнүн, башка каражат ушу кезге чейин которулбай турганын эскертти.
Мамашова Centerra сатылат деген имиштер жүрүп жатканына токтолду.
"Ооба, мындай кептер бар. Кийинки жумада Бишкекке компаниянын жетекчиси келип, өкмөт мүчөлөрү менен жолугат. Эгер ошондой сүйлөшүүлөр жүрүп жаткан болсо, кайсы этапта экенин тактайбыз", — деди өкмөт башчы.
Депутат макулдашуудан кийин мөңгүдөгү кенди иштетүү боюнча документке кол коюлганын, мындай аракет аны жок кылууну мыйзамдаштырып койгонун кошумчалап, буга ким жоопкер экенин сурады.
Абылгазиев тараптар белгиленген шарттын баарын аткарбагандыктан азырынча макулдашуу күчүнө кире электигин белгиледи.
