БИШКЕК, 13-окт — Sputnik. Кыргызстандын Ветеринардык палатасы Дүйнөлүк ветеринардык ассоциациянын толук кандуу мүчөсү болду. Бул тууралуу КРдин Айыл чарба, тамак-аш өнөр жайы жана мелиорация министрлигинин маалымат кызматы билдирди.
Палата бул эл аралык уюм менен жеке ветеринарлардын квалификациясын жогорулатуу билимин тереңдетүү боюнча кызматташууга ниет кылууда.
"Ассоциацияга мүчө болуу бизге чет элдик кесиптештер менен бир толкунда болууга мүмкүндүк берет. Ошондой эле алардын катышуусу менен өткөн ар түрдүү конференциялар, онлайн-тренингдер аркылуу жеке ветеринарлардын деңгээлин жогорулатуу үчүн каражаттарды тартууга, кесиптик билимин кеңейтүүгө жол ачат", — деп эсептейт Ветеринардык палатанын директору Кубат Маматкулов.
2015-жылы жаңы ведомство КРдин Юстиция министрлигинде ветеринардык укуктук-ченемдик органы катары катталган.
Дүйнөлүк ветеринарлар ассоциациясы Эл аралык эпизоотикалык бюро, Дүйнөлүк Саламаттык сактоо уюму жана башка эл аралык уюмдар менен кызматташат. Анын штаб-квартирасы Брюсселде жайгашкан (Бельгия).
