БИШКЕК, 22-фев. — Sputnik. Эл аралык Transparency International уюмунун дүйнөдөгү коррупцияга каршы туруу боюнча рейтингисинде 180 орундун ичинен Кыргызстан 135-болду.
Быйыл өлкө 100 баллдын ичинен 29 упай топтоп, аны Россия, Парагвай, Доминикан, Гондурас, Лаос, Мексика жана Папуа-Жаңы Гвинея менен бир сапка чыкты.
Бул сапар коррупциялык көрүнүштөр, мыйзам бузуулар саналып, анын жыйынтыгы менен атайын баа берилген. Балл канчалык көп болсо, өлкө ошончолук коррупциясыз деп бааланган.
Борбор Азия өлкөлөрүнүн ичинен Казакстандын упайы жогору болуп, 31 балл топтоп, 122-орунга чыккан. Кыргызстан андан 13 позиция ылдый жайгашты. Андан кийин Өзбекстан 157-позиция менен келе жатат. Кийинки сапты 161-орун менен Тажикстан ээлеген. Ал эми Түркмөнстан "эң коррупциялашкан" деген "наамга" татып, 167-орунга чыккан.
Коррупциясы аз дегендердин көч башында Жаңы Зеландия келе жатса (89 балл), андан кийинки орунга 88 упай менен Дания чыккан. Буларга удаа 85 упай менен Финляндия, Швейцария жана Норвегия үчүнчү орунду ээлеген.
Иликтөөчүлөр коррупциясы башынан ашып кеткендер деп Сирия, Түштүк Судан жана Сомали өлкөлөрүн атады.
Sputnik Кыргызстан өлкөдөгү паракорчулук гүлдөгөн мамлекеттик мекемелердин рейтингин түзгөн.
