18:32 02 Теке 2020
Түз эфир
  • USD78.7872
  • EUR89.0098
  • RUB1.1172
Маданият

Шамшиевдердин үч мууну: акын, режиссер, экономист. 32 жыл мурунку таберик сүрөт

Кыскача шилтеме алуу
"Таберик сүрөт" — сейрек кездешкен ирмемдер (107)
100910
Известный акын, журналист Толон Шамшиев с сыном Народным артистом КР, режиссером Болотом Шамшиевым и с внуком экомонистом, ученым Чынгызом Шамшиевым в городе Фрунзе в 1988-году.
© Фото / Александр Федоров

Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, анын тарыхын баяндоону улантат.

Белгилүү акын, журналист Төлөн Шамшиев, уулу КРдин эл артисти, режиссер Болот Шамшиев жана небереси экономист, окумуштуу Чыңгыз Шамшиевдин сүрөтү 1988-жылы Фрунзе шаарында (азыркы Бишкек) тартылган.

Үч муундун өзгөчө сүрөтүн фотограф Александр Федоров үй-бүлөлүк архив үчүн тарткан. Ал жылы Төлөн Шамшиев 75, Болот Шамшиев 47, Чыңгыз Шамшиев он жашта эле.

Ошол кезеңди Чыңгыз Шамшиев мындайча эскерет:

"Чоң атамдан мен мекенди сүйүүнү үйрөндүм. Эл менен болуп, Ата Мекен үчүн кызмат кылуу керек деп көп айтчу. Ал үчүн Кыргызстанда бардык нерсе бар эле. Атамдан да көп нерсени үйрөндүм. Экөөбүз өтө жакын элек. Башында ата-баладай болсок, кийин достордой эле болуп калдык. Менимче, мен атам үчүн жашоосунда ой бөлүшкөн, толук кандуу ачылып сүйлөшкөн санаалаш адамы болдум. Ал дагы өзүнүн мекенин сүйгөн жан эле. Союз маалында аны Лондонго, Австралияга кино тартып иштөөгө чакырган экен. Атам болсо үй-бүлө, мекенимди таштап кантип кетмек элем деп дароо эле баш тартыптыр. Ал "Манас" эпосун, улуттук оюндарды мыкты билчү. Мындан сырткары, ой чабыты кенен, ишке келгенде майда-чүйдө нерселерге өтө көңүл бурчу, эмгекчилдиги менен мыкты эмгектерди жарата алды. Кезинде атам Көк бөрү федерациясын негиздеп, анын ойноо тартибин жазган. Ал процессти өз көзүм менен көрүп, катышып да калдым. Мага анын логотибин тартуу тапшырмасын берген, мен эртеси эртең менен мектепке барышым керек болчу. Таңкы төрткө чейин атамдын маңдайында отуруп тартууга мажбур болгом. Кийин ошол эмгегим федерациянын расмий логотиби болуп калды. Атам менен иштешүү өтө оор болчу, бирок аны менен иштеше алгандар сөзсүз таанымал болуп чыкчу. Мындай белгилүү адамдардын уулу болуу өтө чоң жоопкерчилик. Эгер ийгилик жаратсаң, атасы жардам берип жатат дешет. Эгер бир нерсени туура эмес кылсаң, жаңылсаң сөзсүз элдин алдында бакыйып көрүнүп каласың. Ошондуктан кино тармагына эмес, экономика багыты боюнча кеткем. Мындай жоопкерчиликти мен тандап алган эмесмин, колдон келишинче алардын атын татыктуу алып жүрүүгө аракет жасайм, балдырымды да ошого үйрөтөм", — деди Шамшиев.

 Режиссер Болот Шамшиев актриса Айтурган Темирова менен бир кыз, бир уулду тарбиялап өстүргөн. Кызы Сүйүүтай кесиби боюнча лингвист, эл аралык уюмдарда эмгектенген, учурда үй иштери менен алек. Баласы Чыңгыз Шамшиев Бишкектеги ири ЖОЖдордун биринде вице-президент.

Тема:
"Таберик сүрөт" — сейрек кездешкен ирмемдер (107)

Тема боюнча

Шайыр Касымалиеванын тушоосун кескен. "Куш өмүрдөгү" таберик сүрөт
Голливуд жылдыздары кыргыз актёрлоруна таң калып... "Чыңгыз хандагы" таберик сүрөт
Жээкте "сүйүктүүсүн" кучактаган Чокморов. "Жалаң эркектердеги" таберик сүрөт
Белгилер:
таберик сүрөт, Чыңгыз Айтматов, Болот Шамшиев, Кыргызстан

Дагы инфографика

ЭҢ МААНИЛҮҮ