Кыргызстанда профессионалдык балет бийчилерин мектеп курагынан тарта даярдаган жалгыз гана мектеп бар. Анын ачылганына аз убакыт гана болсо да бул тармакка талпынган кичине балдардын саны жылдан-жылга көбөйө баштаганына Sputnik Кыргызстан агенттигинин кабарчысы күбө болуп келди.
Профессионалдык балетке барам дегендер эми 1-класстан тарта даярдыктарды көрүп баштаса болот. Буга чейин өлкөдө балетке балдар 12 жашынан гана кабыл алынса, эми чүрпөңүздү 5-6 жашынан мыкты хореографтардын колуна тапшыра аласыз.
Аталган балет мектебинин көркөм жетекчиси Аида Ахматалиева окуу жайга балдар катуу талап менен тандаларын баса белгиледи.
"Балет дегенди азыр жаштар эмес, чоңдор деле көрбөй калды. Бирок бул тармакка көрүүчүлөр аз келгени менен ал таптакыр эле жоголуп кетти деп айтуудан алыспыз. Балетке кызыккан жаштар көп, андыктан алдыда үмүттөр чоң. Биз азыр мектепке балдарды атайын түзүлгөн комиссия менен 6-7 жашынан баштап эле кабыл ала баштадык. Алар кадимкидей окушат, бирок балет, гимнастика боюнча атайын сабактар да өтүлөт. Жыл соңунда сөзсүз экзамен тапшырып, кийинки класска көчүшөт. Балдардын сырткы келбетине да көп көңүл бурабыз. Мисалы, салмагы оор же бою, буту кыска кыздар бизде окуй алышпайт", — деди Ахматалиева.
Бардык эле каалоочулар балет бийчиси боло албай турганын айткан педагог-хореограф Ирина Исаева ага талыкпаган эмгек, талант, келбет жана күчтүү эрк талап кылынарын кошумчалады.
Балет бийчилеринин арасынан эркек балдарды чанда гана кездештирүүгө болот. Мындай чечкиндүү, эрктүү мырзалардын арасында 7 жашар Алихан Сабиев бар. Апасы Нуржан Аламанова баласын балетке берген себебин үй-бүлөсүнүн чыгармачылыкка жакын болгону менен байланыштырды.
"Балабыз өзү да бийге жакын, анын үстүнө өзүм жетпей калган максаттарды балам аркылуу ишке ашырып, аны профессионалдык бийге бергим келди. Мындан сырткары, бул жакта тартип күчтүү болуп, адамдын руханий жактан өсөт. Балет мектебине барганга чейин Алихан тентек, өзүнүкүн бербеген эрке болсо азыр кадимкидей токтолду", — деди Алихан Сабиевдин апасы.
"Уядан эмнени көрсө, учканда ошону алат" дегендей ата-эне баланы кичинесинен материалдык байлыкка эмес, руханий байлыкка кызыктырып алардын жан дүйнөсүн азыктандырууга аракет кылуусу керек.
