Балбай Алагушев

Кыргыздын тунгуч музыка таануучусу, Эл агартуунун отличниги, КРнын маданиятына эмгек сиңирген ишмери, Ардактуу профессор, Эл артисти. Журналисттер, композиторлор, Улуттук жазуучулар союзунун мүчөсү. Балбай Алагушев кыргыз радиосунун алтын казынасынын уюштуруучусу. Кыргыздын залкар ырчыларынын, комузчуларынын, кыл кыякчыларынын аткаруусундагы ыр-күүлөрдү өздөрүнүн аткаруусунда тасмага жаздырып, алтын корду түптөөгө салымын кошкон. Ал эл шайырлары, музыка ишмерлери тууралуу ондогон музыкалык очерктерди, маектерди, баарлашууларды, сүрөттөмөлөрдү даярдаган. 1960-жылдан тарта элдик музыканы ар тараптан иликтөөгө баш-оту менен киришкен. Бул жаатта бир топ сандагы биографиялык-этнографиялык очерктерди, монографияларды жазып, басмадан чыгарып, музыкалык сөздүктөрдү, "Кыргыз музыкасынын энциклопедиясын" түздү. Жалпыга билим берүүчү мектептердин 5-8-класстардын "Музыка" окуу китептеринин автору.