БИШКЕК, 4-мар. — Sputnik. Өзбекстандын президенти Шавкат Мирзиёев аткаминерлердин тойго баруусуна тыюу салганын UzNews порталы маалымдады.
Мамлекет башчысы мындай тыюу премьер-министрге, акимдерге жана башка аткаруу бийлигинин өкүлдөрүнө тиешелүү экенин баса белгилеген.
"Эгер мамлекеттик автоунааларды чайханалардын алдынан көрсөм иштен алып, кылмыш жоопкерчилигине тартам. Бой көтөргөн премьер келгенде бардыгы ордунан турган көрүнүш элге жакпайт. Эң жакшысы ошол акчага эт алгыла, же муктаждардын үйүн оңдотуп, телевизор сатып бергиле, уяты жоктор десе!" — деп президенттин ачуусу келген.
Ал ошондой эле Олий Мажлистин Сенаты "үйлөнүү үлпөтүнө чакырылгандардын санына чейин аныктаган" токтом кабыл аларын айтты.
Президент тыюу салуу менен коррупциянын деңгээлин азайтып, өлкөдө адилеттүүлүк орнотууга жардам берерин кошумчалады.
"Бардыгы бирдей той берет. Эгер бир жетекчи, аким, прокурор, салыкчы норманы буза турган болсо ошол күнү түрмөгө камайм, көрөсүңөр. Бапыратып үйлөнүү үлпөт той берүү үчүн акчаны кайдан алып жатат? Мунун бардыгы уурдалган акча! Тойго 110-120га чейин гана киши чакырылат. Эң көп дегенде 150 киши келип, ал дагы атайын комиссиянын уруксаты менен болот. Башкача той болбойт", — деп президент сөз берди.
Жаңы токтомго ылайык, үйлөнүү үлпөт тойлору 13:00дөн 14:00гө чейин гана өткөрүлөт.
