БИШКЕК, 5-апр. — Sputnik. Саламаттык сактоо министри Дамир Осмонов Шаардык балдар ооруканасына барып, кечээ, 4-апрелде, Бишкектеги Жал кичи районунда 6-кабаттан энеси менен кошо кулаган кыздын абалын көрдү. Бул тууралуу ведомстводон кабарлашты.
Дарыгерлердин айтымында, 2022-жылы туулган кыз ооруканага өтө оор абалда түшкөн. Учурда жасалма дем алдыруу аппаратына туташтырылган.
"Бөбөктүн мээси жабыркап, астыңкы жаагы менен оң жак ийин сөөгү сынып кеткен, өпкө жана ички органдары жабыркаган, ошондой эле ооз көңдөйүнөн дагы жаракат алган. Нейрохирург, травматолог, торакалдык хирургдар баш болгон дарыгерлердин консилиуму өттү", — деп билдирди Саламаттык сактоо министрлиги.
Ведомство төрт жашар кызга керектүү бардык медициналык жардам көрсөтүлүп жатканын кошумчалады.
Кечээ, 4-апрелде, Жал кичи районунда келин эки баласы менен 6-кабаттан кулап, эне менен бир жаштагы чүрпөсү каза болду. Ал эми 4 жаштагы кыз жандандыруу бөлүмүнө түшкөн. Шаардык милиция аялдын күйөөсү суицидге жеткирүүгө шектелип кармалганын билдирген.