БИШКЕК, 8-окт. — Sputnik. Сыркоолоп калганда оозго, мурунга, кээде бетке чыккан учук вирусу дүйнөдөгү адамдардын 80-90 пайызында кездешет. Бул тууралуу дерматовенеролог Анна Кутина "Известия" басылмасындагы маегинде билдирди.
Адистин айтымында, учук бардык куракта, дененин бардык жерине: таңдайга, тиштин бүйлөсүнө жана тилге да чыгышы мүмкүн.
Дарыгер вирусту ооруган адамдан жугузуп алуу коркунучун эскертип, азырынча аны организмден жок кыла турган дары жок экенин айткан.
Кутина учукту сасык тумоо, стресс, чарчоо, хирургиялык жана стоматологиялык операциялар, косметологиялык процедуралар күчөтөрүн кошумчалаган.
"Учук чыгарда терибиз кычышып, ысып калат. Ошол маалда (6 сааттан 12 саатка чейин) вируска каршы каражаттарды колдонуп калса жакшы натыйжа берет. Учук орто эсеп менен 7-10 күндө кайтат. Шишип, сууга толуп турган учукту жарбагыла, аны помада же косметика менен жабам деп убара болбогула. Бул вирусту күчөтүп жибериши мүмкүн", — деп эскерткен дарыгер.
Анын айтымында, учук жылына төрт жолу чыкса нормалдуу көрүнүш деп эсептелет. Бирок андан көп жолу чыкса иммунолог менен кеңешип, дарылануу сунушталат. Ошондой эле эл арасында айтылган "иммунитетти көтөрсө учук жоголот" деген сөзгө ишенип, иммунитетти өз алдынча чыңдоого болбой тургандыгы, дарыгердин кеңеши керектиги айтылган. Вирусту алдын алууга жылуу кийинүү, туура тамактануу жардам берет.