Евразия экономикалык биримдигинин (ЕАЭБ) алкагында Интеллектуалдык менчик объектилерин сактоо жана коргоо боюнча №26 протоколу кабыл алынып, уюмдун алкагында укуктук бардык маселелер камтылган. Бул тууралуу Анарбек Исмаилов Sputnik Кыргызстан радиосунун эфиринде маек куруп жатып билдирди.
Анын айтымында, ЕАЭБде интеллектуалдык менчикти коргоо ишине маани берилип, бул багытты өнүктүрүү максатында тоскоолдуктарды жоюу иштери жасалып жатат.
"Евразия экономикалык биримдигинин алкагында Интеллектуалдык менчик объектилерин сактоо жана коргоо боюнча №26 протоколу кабыл алынып, уюмдун алкагында укуктук бардык маселелер камтылган. Анда илим, адабият, искусство, автордук укук, товардык белгилер жана башка багыттар боюнча бирдиктүү эрежелер бекитилген. ЕАЭБде консультативдик комиссия иштеп, интеллектуалдык менчик жаатында уюмга мүчө өлкөлөрдүн мыйзамдарын шайкеш келтирүү боюнча да аракеттерге көңүл бурулуп келет. Мындан тышкары, тоскоолдуктарды жоюу боюнча иштер кызуу жүрүүдө", — деди Исмаилов.
Ошондой эле адис ЕАЭБ рыногунда интеллектуалдык менчик объектилеринин корголушу уюмдун экономикалык байланыштарын жакшыртып, өнүгүшүнө өбөлгө болорун кошумчалады.