БИШКЕК, 6-ноя. — Sputnik. Россиянын мамлекеттик "Росатом" корпорациясы жана Кыргызстандын Энергетика министрлиги өлкөгө аз кубаттуулуктагы атомдук электр станциясын куруу боюнча талкууну улантууда.
"Росатом" корпорациясынын директорунун орун басары Николай Спасский Кыргызстандын энергетика министри Таалайбек Ибраев менен жолугушту
© Фото / Департамент коммуникаций Госкорпорации "Росатом"
Корпорациядан маалымдалгандай, анын директорунун орун басары Николай Спасский Кыргызстандын энергетика министри Таалайбек Ибраев менен жолугушту. Алар "жашыл" энергетика тармагында кызматташуу тууралуу, анын ичинде өлкөгө АЭС жана шамал, суу генерацияларын куруу жөнүндө талкуулашкан.
Бир жыл мурун "Росатом" менен министрлик кызматташуу тууралуу документке кол коюшкан. Тактап айтканда, АЭС долбоорунун техникалык-экономикалык негиздемесин иштеп чыгуу тууралуу сүйлөшүшкөн. Ал эми бир ай мурун корпорация менен Ысык-Көл облусуна шамал электр станциясын куруу боюнча инвестициялык долбоорду иштеп чыгып, аны ишке ашыруу боюнча макулдашууга кол коюшкан.