"Росатом" уран калдыктарын зыянсыздандырууга көмөктөшүүдө
© Sputnik / Шабдан Абылгазы уулу
Жазылуу
ӨКМге караштуу Калдыктарды сактоо департаментинин бөлүм башчысы Бакытбек Асанкулов уран калдыктары сакталган жайларды рекультивациялоо кандай жүрүп жатканын айтып берди.
Уран калдыктары сакталган жайларды рекультивациялоого Россиянын компаниясы көмөктөшүүдө. Бул тууралуу Бакытбек Асанкулов Sputnik Кыргызстан радиосунда маек куруп жатып билдирди.
"Росатом" уран калдыктарын зыянсыздандырууга көмөктөшүүдө
Анын айтымында, ал иштер атайын мамлекеттер аралык келишимдин негизинде жасалууда.
"Өлкөдө жалпы 92 калдык сактоочу жай бар. Анын 58и 1999-жылы өкмөттүн токтому менен ӨКМдин карамагына берилген. 2017-жылы дагы эки объект алынып, жалпы 60 объект министрликтин карамагындагы Калдыктарды сактоо департаментинин балансында. Ал калдык сактоочу жайларда мамлекеттик бюджеттин эсебинен мониторинг жана техникалык көзөмөл иштери жүргүзүлөт. Учура эки ири долбоор иштеп жатат. Алсак, 2012-жылы "КМШ алкагында уран өндүрүшүнүн таасиринде калган мамлекеттердин аймактарын рекультивациялоо" программасы башталган. Ал эки этапта жүргүзүлүп, 2012-2016-жылдар аралыгында долбоордук-сметалык документтер түзүлүп, техникалык-экономикалык негиздемеси даярдалган. 2017-жылы Кажы-Сайдагы калдык сакталган жайда иштер башталып 2019-жылы бүткөрүлдү. Азыркы тапта ал аймак коопсуз болуп эсептелет. Мындан тышкары, 2017-2022-жыл аралыгында Миң-Кушта даярдык этаптар жүргүзүлдү. Учурда ал жактагы Талды-Булак калдык сактоочу жайы "Далнееге" көчүрүлдү. Ошол жакка азыркы тапта Туюк-Суу калдык сактоочу жайы дагы ташылууда. Бул иштерди жүргүзүүгө Россиянын "Росатом" компаниясы көмөктөшүүдө. Аталган компания менен биргеликте иштер жыйынтыкталгандан кийин дагы мониторинг жүргүзүлүп турат", — деди Асанкулов.
Ошондой эле ал аталган аймактарда рекультивация болгондон кийин айыл өкмөттүн балансына өткөрүлүп берилерин кошумчалады.
