БИШКЕК, 26-сен. — Sputnik. Жогорку Кеңешке Өмүрбек Бакировдун ордуна келген Равшанбек Рысбаев депутат Талант Мамытовдун ага асылбай жүрүшүн талап кылды.
Белгилей кетсек, өткөн жумада Мамытов БШК Көк-Жар округу боюнча Рысбаевди жеңүүчү деп таба албай турганын айткан. Анткени буга чейинки протоколдордун баары Бакировдун пайдасына чечилип, ал бүгүнкү күндө жокко чыгарыла электигин белгилеген.
"Ошон үчүн бардык депутаттар шайланып келсе, ал (Равшанбек Рысбаев — ред.) катталып гана келип жатат. Кантип отурат анан бул жерде? Ошондой эле административдик иштер жаңы ачылган жагдайлар боюнча кайра каралбайт. Бул түздөн-түз Конституцияга карама-каршы келет. Сот силерге Бакировдун мандатын алып кой деген эмес, чечимиңерди гана жокко чыгарып жатат", — деп сындаган депутат БШКнын төрайымын.
Рысбаев мыйзам таласында адилеттүүлүк болгону үчүн Бакиров мандатын тапшырып берүүгө аргасыз болгонун билдирди.
"Бул сот процесси эки жылдан бери созулуп келе жатат. Аны Мамытов жакшы билет. Ал Бакировду шайлоодо добуш сатып алуу менен кармалып, кылмыш иши козголгон жеринен колунан жетелеп, 7-кабатка жанына алып келип отуруп алган. Элибизде "ээси келсе бээсин бер" деген жакшы сөз бар. Мени 10 миңден ашык эл шайлаган, Мамытов өзүнүн алган добушун салыштырып, анан бирөөгө асылсын", — деди Рысбаев.
Эскерте кетсек, Бакировду мандаттан ажыратуу чечимин Бишкек административдик соту 7-июнда кабыл алган. кийин аны Бишкек шаардык соту да, Жогорку сот да күчүндө калтырган. 26-август күнү БШК Бакиров депутат болбой калганын расмий жарыялаган.
2022-жылдын 17-ноябрында парламент жыйынында Бакиров УКМК төрагасы Камчыбек Ташиев менен кайым айтыша кеткен. Атайын кызматтын башчысы Бакировдун "кандай депутат экенин жана кандайча шайланып келгенин" билерин айткан. Анын эртеси эле депутатты кабинетинен чыгарып салышкан. Андан соң добуш сатып алуу маселеси козголуп, соттук иштер башталган.