БИШКЕК, 10-авг. — Sputnik. Ички иштер министри Улан Ниязбеков Ысык-Көлдүн "Золотые пески" пансионатынын жанында каза болгон Талас облусунун 23 жаштагы тургунунун жакындары менен жолугушту. Бул тууралуу ИИМдин маалымат кызматы билдирди.
Жолугушууга Талас облусунун башчысы Нурлан Дарданов, Ысык-Көл ОИИБдин жетекчилиги, Республикалык соттук-медициналык экспертиза борборунун директору Сүйүн Касымов, аталган башкармалыктын ыкчам тергөө тобу жана күбөлөр катышты.
Ниязбеков маркумдун жакындарына бул иш объективдүү каралып, ИИМдин эң тажрыйбалуу кызматкеринен ыкчам тергөө тобу түзүлгөнү жана кошумча күбөлөрдү аныктоо боюнча иштердин жүрүп жаткандыгы тууралуу маалымат берген. Ошондой эле ал маркумдун жакындарынын, күбөлөрдүн пикирин уккан.
"Облустук жана райондук милиция тарабынан ар тараптуу иликтөө иштери жүрүп, окуянын бардык жагдайлары иликтенип жатат. Бул иш президенттин көзөмөлүндө, ал тергөөнүн ар бир аракети менен жеке таанышып, изилдеп жатат. Мындан тышкары, кандайдыр шектенүүлөрдү жаратпоо максатында бардык тергөө процесстери боюнча маалымат туугандарына ачык-айкын берилип турат", — деп айтылат маалыматта.
23 жаштагы жигиттин өлүмүнүн себебин аныктоо үчүн Ысык-Көл жана Кара-Буура райондорунун соттук-медициналык экспертиза бюролорунда тиешелүү экспертизалар дайындалган. Бүгүнкү күндө расмий корутунду чыга элек.
Буга чейин интернетке Бостеридеги "Золотые пески" пансионатынын жээгиндеги мушташтан улам 23 жаштагы Талас облусунун тургуну каза болгонун маркумдун бир тууган агасы билдирген. Анын айтымында, экспертизадан кийин милиция баланын талмасы кармап каза болгонун кабарлаган. Анын жакындары окуянын күбөлөрүн издеп жатышкан. Маркумдун достору анын эч качан талма оорусу болбогонун белгилеп, тергөөнү акыйкат жүргүзүүнү талап кылышууда. Милиция болсо алгачкы кароодо маркумдун денесинен кыйноонун белгилери табылбаганын, ага биринчи жардам көрсөтүү учурунда "тилин жутуп алганын байкадым" деген кишинин (өзүн медкызматкер катары тааныштырган) сөзүн келтиришти.
Ишти президент Садыр Жапаров өз көзөмөлүнө алып, ар тараптуу жана объективдүү тергөө жүргүзүүнү тапшырды.