БИШКЕК, 31-окт. — Sputnik. Министрлер кабинетинин төрагасы Акылбек Жапаров Баткен облусуна болгон жумушчу сапарынын алкагында айыл өкмөт башчылары менен жолугушуу өткөргөнүн өкмөттүн маалымат кызматы кабарлады.
Анда Жапаров өлкөдө 453 айыл өкмөттүн 377си дотацияда турганын белгилеген.
"Өткөн жылы Бишкек шаарында жолукканда сиздерге тапшырмалар берилген. Бирок иш талаптагыдай аткарылбай жатат. Кадрларды аттестациялоо жана ротациялоо иштери жүргүзүлдү. Анткен менен эки жылдан бери ишиңиздерде жылыш байкалбай, мурдагыдай эле эски ыкма менен иштеп жатасыздар. Бир жыл өттү, жыйынтык чыгарууга убакыт келди. Сыйлыкка татыктууларга сыйлык беребиз, эски ыкма менен иштеп, натыйжа көрсөтө албагандар менен коштошобуз. Элге эң жакын бийлик бул жергиликтүү бийлик. Жергиликтүү калктын, аймактын социалдык-экономикалык маселелерин чечүү милдети сиздерге жүктөлгөн", — деди өкмөт башчы.
Ал айыл өкмөттөрдү Кадамжай районундагы Алга кадам массивине канал куруу сыяктуу инфраструктуралык долбоорлорду иштеп чыгууга чакырды.
"Тоо аркылуу узундугу 25 чакырым болгон канал курулган. Долбоордун жалпы наркы 2,9 миллиард сомду түзөт. 50 пайызын мамлекет, калган жарымын ишкерлер каржылайт. Биз аймактардагы келечектүү демилгелерге жана долбоорлорго мамлекеттик колдоо көрсөтүүгө даярбыз", — деген ал.
Жапаров жумушчу сапарынын жүрүшүндө Кадамжай районунун Марказ айылындагы орто мектептин абалы менен таанышып, келерки жылы айылда дагы бир мектеп курула турганын айткан.