Бул ирет фашисттерди артынан кубалаган кыргыз Кусейин "Советтик Кыргызстан" гезитинде иштеген Курмаш Кыдырбаевага кат жазган. Кат кичинекей баракчага карандаш менен жазылган.
Архивдик документтерде фронттогулар гезит редакциясына көп кат жазганын байкоого болот. Стенографист Кыдырбаева согуш майданынан келген каттарды кийин гезит беттерине да жарыялап турган.
Каттын орфографиясы сакталды
Кандай, саламатта турасыңбы? Өткөндө кат жаздым эле, алган чыгарсың, бирок аз убакыт болсо да, бир далай өзгөрүштөр болуп кетти.
Себеби: көп күндөн бери чегинип бара жаткан душмандардын артынан кээде кагышып, кээде атышып дегендей бара жатып, бүгүн Чочо база деген жерге келип түнөп, эртең менен жазып отурам. Азырынча турмуш жаман эмес, себеби жер кепеден (окоп) кутулуп дегендей, эркинче басып бара жатканга кубанып, батышты көздөй бара жатабыз.
Бул катты жазып жатканда душмандардын чегингенин уктум. Азыр резервдеги командирлер камынып жатышат. Кийинки катта болгон жаңылыктарды жазармын.
Кайыр, кош саламатта бол, сенден бир жарым жылдан бери кат албадым. Кусейин
17.9.43
Тема боюнча: