БИШКЕК, 15-фев. — Sputnik. Жогорку Кеңештин депутаты Марлен Маматалиев Кыргызстанга оң рулдуу автоунааларды киргизүүгө уруксат берген мыйзам долбоорун иштеп чыкты.
Муну менен 2015-жылы аталган машиналарды өлкөгө киргизүүгө тыюу салган норманы жокко чыгаруу сунушталууда. Мыйзамдын долбоору ЖКнын сайтына коомдук талкуу үчүн жайгаштырылды.
Документте мындай автоунааларга "озуп өтүүдө" керек болчу монитору бар камераларды сөзсүз түрдө орнотуу талабы коюлган.
Долбоордун негиздемесинде оң рулдуу автоунааларды жарандардын коопсуздугу үчүн өлкөгө киргизбөө чечими кабыл алынганы белгиленген.
"Анткен менен технологиянын өнүгүшү бир орунда турган жок. Оң рулдуу автоунаалар жүргөн кээ бир мамлекеттерде озуп өтүү үчүн колдонулган монитору бар камераларды пайдаланып жатышат. Бул адегенде башка унаадан ашып өтүүдө алды жактагы жол бош же бош эместигин көрсөтүп, кырсыктарды алдын алат", — деди депутат.
Мыйзам долбоордо оң рулдуу автоунаалардын техникалык абалы эң мыкты деңгээлде экени белгиленген. Алардын көбү сапат менен ыңгайды биринчи орунга койгон Япониядан чыгары кошумчаланган.
"Чыккан жылы жана башка техникалык көрсөткүчтөрү биздин рынокко келип жаткан сол рулдуу машиналарга караганда алда канча жакшы. Мындан тышкары, жаңыраак автоунаалар келсе экологияга дагы терс таасири аз болот", — деп айтылат документте.
Ушул себептерден улам Кыргызстанга кайрадан оң рулдуу автоунааларды алып келүүгө уруксат берүү сунушталууда.
Буга чейин ЖК депутат Чолпон Султанбекова жарандардын кайрылуусу боюнча парламенттеги депутаттардын тобу оң рулдуу автоунааларды алып келүүгө коюлган чектөөнү алып салуу боюнча мыйзам долбоорун даярдап жатканын билдирген. Жол кыймылы коопсуздугун камсыздоо башкы башкармалыгынын (ЖКККББ) жетекчиси Азамат Исраилов мындай унаалардын айынан жол кырсыктары көбөйүп кеткенине байланыштуу демилгеге каршы экенин айткан болчу.
Бүгүн министрлер кабинетинин төрагасы Акылбек Жапаров дагы каршы пикирин айтты.