БИШКЕК, 17-янв. — Sputnik. 2021-жылдын 11 айында Кыргызстан беш мамлекетке алтын экспорттогон. Бул тууралуу Улуттук статистикалык комитеттин маалыматында жазылган.
Алтынды экспорттоо
Январь айынан ноябрга чейин Кыргызстан 5 тонна 269,5 килограмм баалуу металл сыртка чыгарып, ноябрда эле 201,1 килограмм алтын сатылган (Швейцария алган).
Мурдагы жылдыкы менен салыштырганда экспорт 11 тоннага азайган.
Кайсы мамлекеттер алган?
Акыркы жылдары Кыргызстандан алтын Улуу Британияга көп сатылган (2021-жылы ал дээрлик 4,1 тонна баалуу металл алган). Бирок июндан берүү сатуу токтоп калган. Түркия, Италия жана Россия анча көп эмес көлөмдө алтын сатып алышканы айтылды.
Сентябрда сатып алуучулардын тизмесине Швейцария кошулган. Ал эми октябрь менен ноябрда алтын ушул эле мамлекетке сатылды. Белгилей кетсек, 2017-жылы Швейцария кыргыз алтынын алган негизги мамлекет болуп эсептелчү. Кийин ал жакка экспорт токтоп калган.
Алтын алган өлкөлөр:
Улуу Британия — 4 тонна 81 килограмм;
Швейцария — 1 тонна 99,7 килограмм;
Россия — 33 килограмм;
Түркия — 28,5 килограмм;
Италия — 27,2 килограмм.
2020-жылдын ушул маалында 16 тонна 278,3 килограмм алтын сатылган. Анын дээрлик 18 килограммын Түркия, калганын Улуу Британия алган болчу.
Алтын казуудагы абал
Мамлекеттик органдар 2021-жылы баалуу металл өндүрүшүнүн көлөмү төмөндөй турганын өткөн жылы эле болжолдошкон. Алсак, Экономика министрлигинин маалыматы боюнча, Кумтөр жана Талды-Булак Сол жээкте кен казуу иштери рудасында алтындын курамы аз болгон аймакта жүргүзүлөт.
Мындан тышкары, "Кыргыз алтындын" өндүрүшү консервацияланышы күтүлүүдө. Бирок ошол эле маалда Жер-Үй (иш башталган) жана Чаарат алтын кендерин ишке киргизүү пландалган.
Эске салсак, май айында Кумтөрдө тышкы башкаруу киргизилген. Жаңы администрациянын айтымында, кен пландалган режимде иштеп жатат жана өндүрүштүк тапшырмаларды аткара аларына ишендирүүдө.
Сатуу жана казуу боюнча абал
Июнь айында 6,2 килограмм экспорттолсо, июлда бир грамм да чыгарылган эмес, ал эми августта 20 килограммдай алтын сатылган.
17-сентябрда Лондон ассоциациясы "Кыргыз алтын" аффинаждык заводун ишенимдүү сатуучулардын тизмесинен убактылуу чыгарып салганы белгилүү болду.
Сентябрь айынын соңунда Камчыбек Ташиев июнь жана июль айларында Кумтөр кенин иштетүүдөн 90 миллион доллар киреше түшкөнүн билдирген.
Октябрь айынын орто ченинде Акылбек Жапаров Кумтөр кени тышкы башкарууга өткөндөн кийин беш тоннадан ашык алтын казылып, 100 миллион сомдой пайда көргөнүн айткан.