БИШКЕК, 15-июн. — Sputnik. Коррупцияга тиешеси бар деген шек менен издөө салынган ишкер, "Ала-ТВ" компаниясынын негиздөөчүсү А. Х. кармалды. Бул тууралуу Бишкек шаарындагы Биринчи май райондук сотунан кабарлашты.
27-майда шектүү А. Х. боюнча баш коргоо чарасы сыртынан каралып, камакка алуу чечими кабыл алынган жана ага издөө салынган.
"А. Х. аттуу жаран 12-июнда УКМК кызматкерлери тарабынан кармалып, эртеси №1 убактылуу тергөө жайына бир айга киргизилди. Кылмыш кодексинин эки — 42 жана 319-беренелери ("Кылмышты аткаруу" жана "Коррупция") менен шектүү катары каралууда", — деп айтылган маалыматта.
Бул маалыматты Башкы прокуратурадан тастыкташты.
Буга чейин эл өкүлү Жанар Акаев парламентте азыркы өкмөт мамлекеттик жыштыктарды сатуудан бюджетке 5 миллиард сом зыян келтиргенин айтып, ага премьер-министрдин тиешеси бар экендигин билдирген. Ал эми өкмөт башчы Мухаммедкалый Абылгазиев билдирүү негизсиз деп жооп берген.
Эске сала кетсек, Мамлекеттик байланыш агенттигинин мурдагы директору Наталья Черногубова уюлдук оператордун бири жана Маалыматтык технологиялар комитетинин кызматкерлери менен тымызын сүйлөшүү жүргүзгөн деген шек менен 12-майда кармалган.
Кийин бул иш Аскер прокуратурасына өткөрүп берилген.