БИШКЕК, 3-май — Sputnik. Коронавирус жуктуруп алып каза тапкан дарыгер Жүзүмкан Көкүмбаеванын үй-бүлөсүнө 1 миллион сом компенсация төлөнөт. Бул тууралуу Коомдук саламаттык сактоо башкармалыгынын башчысы Айнура Акматова брифинг учурунда билдирди.
“Учурда акча тууралуу кеп кылуу кыйын болуп турат. Бирок айта кетсем, каза тапкан кесиптешибиздин үй-бүлөсүнө компенсация төлөп берүү боюнча документтер даярдалып жатат”, — деди Акматова.
Белгилей кетсек, кечээ, 2-май күнү, коронавирус жуктуруп алган дарыгер көз жумган. Ал Бишкектеги №3 үй-бүлөлүк дарыгерлер борборунда эмгектенип келген.
Бүгүн дагы 26 адам вирус жуктуруп, жалпы саны 795ке жетти.
Кыргызстанда коронавирус тууралуу соңку маалыматтарды Sputnik Кыргызстандын тексттик баяндамасынан окуп туруңуздар.